Balva
Balva - əsasən yaz vaxtı bişirilən qədim Azərbaycan yeməyidir. Yeməyin əsas inqrediyentləri tər göyərti, düyü və bulyondan ibarətdir. Müxtəlif bölgələrin xüsusoyyətlərinə yeməyin tərkibində dəyişikliklər ola bilər, buna görə sizə balvanın ən yayılmış reseptini təqdim edirik.
Tərkibi:
- 150 qr düyü
- 100 kərə yağı
- 1 ədəd orta ölçülü soğan
- 2 dəstə ispanaq
- 2 dəstə keşniş
- 1 dəstə şüyüd
- 1 dəstə cəfəri
- 1 dəstə kəvər
- 1 dəstə göy soğan
- duz, istiot
Hazırlanması:
Düyü öncədən bir qabda yuyulub, isladılır. Göyərtilər təmizlənir, yaxşıca yuyulur. İncə doğranmış soğan yağda qovrulur, üzərinə eyni cür incə doğranmış göyərti əlavə edilir, qarışdırılır. Göyərti və soğan birgə qovrulduqdan sonra üzərinə düyü əlavə edilir, bulyon süzülür və bişirilir. Sonda zövqə görə duz və istiot səpilir.
Məsləhət:
Əgər əməköməci otunu tapsanız, mütləq bu yeməyə onu əlavə edin. Şorbanın bişməsinə çox az qalmış bir ədəd çırpılmış yumurta əlavə edib yaxşıca qarışdıra bilərsiniz. Həmçinin zövqə görə balvaya quru və ya təzə alça əlavə etmək olar.